Rússnesk herstöð á Íslandi!

Amms, fyrirsögnin er víst rétt. Var að horfa á fréttirnar á Stöð 2 og þar er talað um að Rússar vilji setja upp herstöð á Íslandi gegn þessu myndalega láni sem þeir vilja veita.  Þetta er víst verið að taka fyrir í neðri deild rússneska þingsins um þessar mundir.  Ísland stendur náttúrulega svo illa að ef til kemur að við verðum nauðbeygð að taka við peningum frá Rússlandi þá verðum við víst að sætta okkur við það sem lánadrottnarar leggja fram.  Ég var víst búinn að spá þessu og það var alveg ljóst að Rússar myndu vilja eitthvað á móti.

Nú erum við skotmark tækifærissinna út um allann heim.  Margir sjá sér eflaust leik að borði að kaupa sig inn í stór og arðbær fyrirtæki framtíðarinnar á Íslandi.  Þannig sá ég þetta tilboð frá Bandarískum aðila sem vildi kaupa virkjanir á Íslandi og borga áætlaðan gróða fyrirfram.  Þetta er náttúrulega gullið tækifæri og sorglegt ef við þyrftum að gefa þetta svona frá okkur fyrir skjótfengann gróða sökum efnahagsástandsins.  Ég stend ennþá við mína skoðun með að við hefðum átt að vera búin að leita til Norðmanna fyrir löngu.

Svo virðist vera sem að allt stefni í 75% verðbólgu.  Ég verð að viðurkenna að ég er ekki alveg viss hvað það þýðir fyrir hinn almenna landa eins og mig en talað er um að ástandið verði eins og árið 1984.  Það hljómar hræðilega að mínu mati.  Mamma og Pabbi skildu, amma mín dó, ég hóf hina ógnvekjandi skólagöngu og við áttum svart/hvítt sjónvarp og ekkert vídeó.   Ég man að íbúðir kostuðu ekki nema 2-5 milljónir og bílar ennþá minna. 

Ég vona að þetta ástand komi ekki til aftur.  Ég held að við þurfum að taka svolítið rússnesku aðferðina á þetta.  Rússar lentu  nefnilega í þessu hérna einu sinni, þeir sáu að allt var að fara til fjandans og þá kom bara "ohó" frá þeim og svo var öllu skellt í lás.  Öllu var beint inná við og innflutning var haldið í lágmarki.  Nægjusemi og fátækt takk.  Þetta sýnist mér að við verðum að gera líka, beina okkar inn á við, auka við fiskveiðar, reyna að auka við útflutning og minnka að sama skapi innflutning.

Það er náttúrulega deginum ljósara að við verðum að halda uppi innflutning á kornvörum samt sem áður til að halda brauðgerð á landinu og bruggverksmiðjunum gangandi.  

Ekki niðurstaða í Moskvu

Athugasemdir

[Þrúður Finnbogadóttir, 15.10.2008 kl. 20:08]

Ég ætla svo innilega að vona að ráðamenn þjóðarinnar sjái að sér og þiggi ekki lán frá Rússum...ég veit ekki hvað það er en mín persónulega skoðun er sú að Rússum sé ekki treystandi.

[Guðmundur Ásgeirsson, 16.10.2008 kl. 10:28]

Þessi Zhirinovski sem lagði þetta til í Dúmunni er nú kexruglaður og í algjörum minnihluta held ég. Þegar hann bauð sig fyrst fram var eitt af stefnumálum hans að gera Ísland að fanganýlendu, og ef ég man rétt þá er hann líka Gyðingahatari eða eitthvað álíka.... (með fyrirvara um misminni). Sem betur fer er þessi maður ekki í flokki með Pútín og félögum sem þar ráða mestu.

Sammála því að brýnt sé að skaffa hveiti fyrir bruggverksmiðurnar!

[Einar Sveinn Ragnarsson, 17.10.2008 kl. 20:29]

Jú þetta er rétt hjá þér Guðmundur, það er Zhirinovski (eðahvernigsemþaðerskrifað) sem leggur þetta fram, og jújú, hann vildi gera Ísland að fanganýlendu og það besta sem hann lagði fram var þegar fuglaflensan var að blossa upp.  Þá vildi hann raða hernum eftir landamærum Rússlands og skjóta allt kvikt sem reyndi að fljúga yfir.    En það breytir því því miður ekki að þetta er tekið fyrir í neðri deild þingsins og því á hættulegum grundvelli þar sem það gæti verið samþykkt.